السلام عليكم و رحمة الله و بركاته
شباب الكل يعرف انه وحدة من المشكلات المزعجة اللي تواجهة الحداقة هي انكسار مفصل الآيس بوكس اللي يربط غطاء الآيس بوكس بالجسم. و مثل ما انتو عارفين ماكو قطع غيار للآيس بوكس في الديرة و ممكن الواحد يضطر يشتري مطارة جديدة بسبب انكسار مفاصلها.
اليوم بإذن الله جايب لكم طريقة سريعة جداً و غير مكلفة لتصليح المفصل و إن شاء الله تنال على إعجابكم
أول شي هذي صورة المفصل المكسور
و لتصليح هذا المفصل نحتاج إلى قطعة سيليكون اسمها بيز السيليكون الحراري. هذي القطعة وجدتها في مركز لوازم العائلة في جمعية السالمية و سعرها حوالي 600 فلس تمتاز بأنها مرنة جداً و قوية بنفس الوقت و هذي صورتها
باقي الادوات المطلوبة بكل بساطة قلم و مقص حاد و مفك و طبعاً المفصل المكسور
الخطوات:
أولا شي نحط المفصل المكسور فوق البيز السيليكون و نحدد داير مداره بالقلم
هذي الصورة بعد تحديد المفصل على السيليكون
ثاني شي نقص السيليكون على حسب التحديد اللي رسمناه
لاحظوا اني بعد حددت اماكن ثقوب البراغي
الخطوة التالية تثقيب أماكن البراغي على قطعة السيليكون. أنا عن نفسي ثقبتهم بإستخدام نفس براغي المفصل
آخر خطوة نثبت قطعة السيليكون بين المفصل و بين جسم الآيس بوكس مثل ما هو واضح بالصورة التالية. هني دور السيليكون انه يمسك المفصل المكسور و يثبته
و هذي صورة ثانية للغطاء و هو مفتوح و واضح شلون قطعة السيليكون مثبتة المفصل
أرجو أن أكون قدرت أوصلكم الطريقة بشكل واضح و اللي عنده أي اسئلة يتفضل يسأل و إن شاء الله أقدر أجاوب على أسئلتكم
و بالنهاية أرجو يكون هالموضوع المتواضع عجبكم و تلاقونه مفيد لكم
و السلام عليكم و رحمة الله و بركاته