السلام عليكم و رحمة الله و بركاته
هذا أول موضوع لي في منتدى فارس و بحار و أتمنى أن يحوز على رضاكم. الطلعة كانت يوم السبت 29/1/2011 من الساعة 7 صباحاً و الوجهة كانت منطقة في بحر الكويت تسمى الركسة، ميزة هذي المنطقة إنها فيها خير كثير لكن لأن مايتها غزر الحداق ما يصلح فيها إلا في الفساد و لازم يكون الهوا طايح و الموج خفيف لأنها تعتبر نوعاً ما بحر مفتوح و موجها صعب شوي.
أول ما وصلنا و لله الحمد بين علينا صيد طيب، صحيح كميات قليلة لكن أحجام حلوة. على الساعة 11 تقريباً وقف الصيد و ماكو إلا مجوة. قلنا نغير المكان و نروح لمنطقة أخرى تسمى الدفان و بصراحة كانت غلطة كبيرة لإن الدفان مافيها سمك أبداً إلا نويبية وحدة منحاشة من الركسة :)
الحمدلله على كل حال توفقنا بصيد طيب و استانسنا و كل واحد روح بإيدام حق الغدا. و أخليكم ألحين مع الصور
أول الطلعة و شروق الشمس. أصبحنا و أصبح الملك لله
بوحسين و لحظة ترقب بعد النزول بالأسلحة الثقيلة
الشاي مع الكيك الوردي اللي كان السلاح السري و اسألوا النوخذة بوشهاب :D
الشباب مركزين بالصيد و مجابلين خيوطهم عدل
أول الخير و ينمة مزيونة
بوحسين و مفاجأة الطلعة أول بالول نصيده في طلعاتنا :)
و صورة ثانية يستاهل العقيد
عماد و نويبية
بوشهاب الصعب و نويبية من الحجم الصعب. و أحب أغتنم الفرصة و أوجه لبوشهاب شكر خاص على التصوير المبدع خلال الرحلة. تسلم ايدينك يا نوخذتنا
بوشهاب و بعد نويبية. هالمرة كان بوشهاب هو هداف الطلعة
و الثالثة من ايد بوشهاب
و هذي ينمة ثانية
نويبية الدفان اليتيمة المأسوف على شبابها :D
مجموع الصيد المتواضع
و هذا يا طويلين العمر فيديو الطلعة. هالمرة حطينا كل اللقطات حتى اللي كانت نهايتها غير متوقعة علشان تعيشوا معانا جو الطلعة و تعرفون إنه الصيد أرزاق و الواحد ما ينال إلا نصيبه.
و بالنهاية أرجو أن يكون الموضوع و الفيديو عجبكم و سامحونا على القصور